Lakai Saadiq III
Seapara nkwe sa dipounama borethe,
matlho masweu leswafe.
O o letlalo le leng mebalabala.
Mokganni wa maru a a boima ima ima.
Mmagorena, Moanya nokeng ya matswele,
Mmagorena o o mokokotlo wa metlhala ya mangope.
Mangope a a ikepileng ka makwete,
A lebileng magageng a a boteng.
Mmago dikgosigadi,
Di maoto a a sa tlhabiweng ke mebitlwa.
Dikgosigadi di itseng monkgo wa bofataladi jwa banna,
Le metlhala e e tsileng go gatiwang ke maungo a dipeo tsa bona.
Mmago dikgosi di dikgaogannang tlhogo ya tsie,
Dikhudu tsa mariga di itsiweng ke mmei.
Banepa dinaledi ba maleme a a buduleng.
Maleme a a butswisitweng ke gokoma botala jwa madi a dikgwenyape.
Bana ba motlhaba o o palletse bokgopo ba korong.
Mmu, seloko.
Mmagorena, setlogolo sa barolong.
Mosadi wa mongwato, o ditshika tsa dikoena.
Motshweneng, khudu thamaga, poo kgolo,
Mosadi wa go ipofa ka makgabe a sekei,
O moikgantsho wa Setswana.
Mmagorena.
